ئۇيغۇر ئاگېنتلىقى 2024-يىلى 13-مارت
ئامېرىكا يەرلىك قاناللىرىنىڭ خەۋەر قىلىشىچە سەيشەنبە كۈنى ئۆتكۈزۈلگەن دېموكراتچىلار بىلەن جۇمھۇرىيەتچىلەرنىڭ پارتىيە ئىچى سايلىمىنىڭ نەتىجىسىگە ئاساسلانغاندا پرېزىدېنت جو بايدىن بىلەن سابىق پرېزىدېنت دونالد ترامپنىڭ بۇ يىللىق پرېزىدېنت سايلىمىدا ئەڭ ئاخىرقى بەيگىگە چۈشۈشى ئاساسەن مۇقىم بولغان. تۆت تۈرلۈك ئەيىبلەش سەۋەبلىك 25-مارت سوتقا چىقىش ئالدىدا تۇرغان دونالد ترامپ ئۆزىنىڭ بۇ يىللىق پرېزىدېنت سايلىمىغا پۇختا تەييارلىق قىلىۋاتقانلىقىنى ئىپادىلىگەن. ئۇ CNBC خەۋەر قانىلىنىڭ زىيارىتىنى قوبۇل قىلىپ مۇنداق دېگەن: « مەن بايدىننىڭ بىردىنبىر رەقىبى!».
جو بايدىن سەيشەنبە كۈنىدىكى دېموكراتچىلار پارتىيەسى سايلىمىدىن كېيىن بايانات بېرىپ مۇنداق دېگەن: «مەن دۆلىتىمىزدىكى كەڭ دېموكراتچىلار ئىتتىپاقىنىڭ ئىشەنچىسىگە يەنە بىر قېتىم ئېرىشكەنلىكىمدىن پەخىرلىنىمەن، شۇنىڭ بىلەن بىر ۋاقىتتا دونالد ترامپ تىن كېلىۋاتقان تەھدىتلەرنىڭ ئەڭ يۇقىرى پەللىگە چىققان پەيتىدە، دېموكراتچىلار پارتىيەسى شۇنداقلا پۈتۈن ئامېرىكىنى توغرا يېتەكلەپ كېتەيلەيدىغىنىمغا ئىشەنچىم كامىل».
