ئۆلتۈرۈلگەن ئۇيغۇرلار تىزىملىكى خىزمىتى
تاھىر ئىمىن ئۇيغۇرىئان
ئۇيغۇر ئاگېنتلىقى
خىتاي كوممۇنىستلىرىنىڭ ئۇيغۇرلارغا قاراتقان ۋەھشيانە زۇلۇمى چېكىگە يېتىپ ھەر كۈنى سوراقتا ئۆلتۈرۈلۈۋاتقان، لاگىر-تۈرمىدە ئۆلگەن، ئۆزىنى ئۆلتۈرۈۋالغان ئۇيغۇرلارنىڭ سانى كۈنسېرى كۆپەيمەكتە ۋە بۇ ھەقتە ئېنىق بولمىغان ئۇچۇرلار ئېقىپ يۈرمەكتە. دۇنيانىڭ خىتاينىڭ ئۇيغۇر سىياسىتىنى تەنقىد قىلىشىغا ئەگىشپ، خىتاي يالغان تەشۋىقات ئارقىلىق لاگىرلارنى پەردازلىماقتا، خىتاينى خەلقئارادا تەلتۆكۇس يېڭىشنىڭ مۇھىم ئۇسۇللىرىدىن بىرى-بىگۇناھ ئۆلتۈرۈلگەن بارلىق ئۇيغۇرلارنىڭ ئۇچۇرلىرىنى رەتلەپ، دۇنياغا پاش قىلىشتۇر!
ئەركىن دۇنيادا ياشاۋاتقان ئۇيغۇر بولۇش سۈپىتىمىز بىلەن بىزنىڭ بۇ ھەقتە سۆزلەش، بىلدۇرۇش، ھەرىكەت قىلىش مەسئۇلىيىتىمىز بار.
ئۇيغۇر ئاگېنتلىقىدىكى تەتقىقاتچى، تەرجىمان دوستلىرىمىزمۇ بۇ ھەقتە ئىزدىنىپ بىر قىسىم ئۇچۇرلارنى توپلىدى ۋە رەتلىدى، ئەمما يېتەرسىز.
بىز دۇنيانىڭ ھەر قايسى جايلىرىدىكى قېرىنداشلىرىمىزنىڭ بۇ ھەقتە بىزنى ئىسم، رەسم، ئورۇن، ۋاقىت ۋە باشقا تەپسىلات بىلەن تەمىنلىشىنى سورايمىز. پەقەت ئۆلتۈرۈلگۈچىنىڭ ئۇچۇرى لازىم. بىز بۇنى ئامېرىكا ھۆكۈمىتى، ئامېرىكا تاراتقۇلىرى ۋە بىرلەشكەن دۆلەتلەر تەشكىلاتى كىشىلىك ھوقۇق كومىتېتىغا تەمىنلەيمىز، قاتىل ۋە ۋەھشى خىتاينىڭ ئەپتى-بەشىرىسىنى ئاچىمىز. ھەر قانداق تىلدا بولسا بولىدۇ، تەرجىمانلىرىمىز دۇنيادىكى 20 دىن ئارتۇق تىلدا تەرجىمە قىلىپ سۇنىدۇ.