ئۇيغۇر ئاگېنتلىقى 2024-يىلى 8-مارت
خەلقئارا تاراتقۇلارنىڭ 8-مارتتىكى خەۋەرلىرىگە ئاساسلانغاندا، ئامېرىكا ھەربىي تەرەپ ئۇچۇر ئانالىزچىسى يېقىندا خىتايغا ئامېرىكا ھۆكۈمىتى ۋە ھەربىي مەخپىيەتلىكىگە دائىر ئۇچۇرلارنى ساتقانلىقى سەۋەبلىك قولغا ئېلىنغان.
مەلۇم بولۇشىچە Korbein Schultz ئىسىملىك سېرژانت دەرىجىلىك بۇ ھەربىي خادىم ئۆزىنىڭ ئىمتىيازىدىن پايدىلىنىپ مۇتلەق مەخپىي دەپ قارالغان ئامېرىكا ھەربىي تەرەپنىڭ راكېتا قويۇپ بەرگۈچى ئەسۋابلىرىغا دائىر ئۇچۇرلىرىنى خوڭكوڭدا تۇرۇشلۇق نامەلۇم بىرىگە سېتىپ 42مىڭ دوللار نەپ ئالغان. بۇ ئۇچۇرلار ئامېرىكىنىڭ تەيۋەن مۇداپىئە سىستېمىسىغا دائىر ئىنتايىن مۇھىم دەپ قارالغان ئۇچۇرلىرى ئىكەن. 24 ياشلىق مەزكۇر ئەسكەر7-مارت كۈنى 6 تۈرلۈك جىنايەت بىلەن ئەيىبلىنىپ قولغا ئېلىنغان.
نۆۋەتتە ئامېرىكا فېدېراتسىيە تەكشۈرۈش ئىدارىسى بۇ ھەققىدە بايانات بېرىپ بۇ ئۇچۇرلارنىڭ ئامېرىكا دۆلەت بىخەتەرلىكىگە ئېغىر دەرىجىدە تەھدىت ئېلىپ كېلىدىغانلىقىنى بىلدۈرگەن. ئەمما بېيجىڭ تەرەپ بۇ توغرىسىدا «ھېچقانداق خەۋىرىمىز يوقكەن» دەپ بايانات بەرگەن.
