ئارمان
ئۇيغۇر ئاگېنتلىقى 2023-يىلى 7-ئۆكتەبىر
خىتاي تاشقى ئىشلار مىنىستىرلىقى تورىنىڭ خەۋىرىدە دېيىلىشىچە، ئافغانىستان ۋاقىتلىق ھۆكۈمىتىنىڭ تاشقى ئىشلار مىنىستىرى ئەمىر خان مۇتتاقى 5-ئۆكتەبىر تىبەتنىڭ لىنجى شەھىرىدە ئۆتكۈزۈلۈۋاتقان « ھىمالايا تېغىنى چۆرىدىگەن خەلقئارا ھەمكارلىق مۇنبىرى» يىغىنىدا خىتاي تاشقى ئىشلار مىنىستىرى ۋاڭ يى بىلەن كۆرۈشۈشتە بولغان.
سۆھبەتتە مۇتتاقى مۇنداق دېگەن: « ئافغانىستان تەرەپ تېررورىزمغا قارشى ھەرىكەتتە زور خىزمەتلەرنى ئىشلەپ كەلمەكتە، خىتاينىڭ بىخەتەرلىكىگە تەھدىت دەپ قارالغان مەسىلىلەر ئەمەلىيەتتە ئافغانىستاننىڭ بىخەتەرلىكى ئۈچۈنمۇ چوڭ بىر خىرىس. بىز دۆلىتىمىز تەۋەسىدە خىتاي بىخەتەرلىكىگە بۇزغۇنچىلىق قىلىدىغان ھەرقانداق بىر ھەرىكەتنىڭ يۈز بېرىشىنى قەتئىي تۈردە چەكلەيمىز… بىز ئافغانىستاندىكى ھەرقانداق بىر خىتاي پۇقراسىنىڭ بىخەتەرلىكىگە كاپالەت بېرىمىز.»
خىتاي تاشقى ئىشلار مىنىستىرلىقى تورىنىڭ بۇ ھەقتىكى بەرگەن ئۇچۇرىدا دېيىلىشىچە، ۋاڭ يى قىلغان سۆزىدە ئافغانىستاننىڭ داۋاملىق تۈردە تېررورىزمغا قارشى ئۈنۈملۈك تەدبىر قوللىنىپ تەۋەلىكىدىكى «شەرقى تۈركىستان تېررورلۇق كۈچلىرى» نى تەلتۆكۈس يوقىتىشى كېرەكلىكىنى تەكىتلىگەن.
