يۈسۈپجان
ئۇيغۇر ئاگېنتلىقى 2023-يىلى13-ئۆكتەبىر
ئامېرىكا مېدىئالىرىنىڭ خەۋەرلىرىدىن مەلۇم بولۇشىچە، 9-ئۆكتەبىر خىتاينىڭ سان فىرانسىسكو شەھىرىدە تۇرۇشلۇق كونسۇلخانىسىغا ھۇجۇم قىلغۇچىنىڭ كىملىكى ئېنىقلانغان. خەۋەر قىلىنىشىچە مەزكۇر ھۇجۇمچىنىڭ ئىسمى ياڭ جەنيۇەن بولۇپ يۇرتى شەندۇڭلۇق ئىكەن.
ساقچىلار ياڭ نىڭ تۇرالغۇسىدىن سىياسىي سۇيىقەستكە ئائىت كىتاب ماتېرىياللار، بىر دانە يالغان تاپانچا، پىچاق قاتارلىق نەرسىلەرنى بايقىغان. سان فىرانسىسكو يەرلىك خەۋەر قاناللىرىدا دېيىلىشىچە، ئۇ 2014-يىلى شەندۇڭدىكى «چۈفۇ پېداگوگىكا ئۇنىۋېرسىتېتى»نى پۈتتۈرۈپ ئامېرىكىغا كەلگەن. ئۇنىڭ بىلەن بىللە تۇرغۇچىلارنىڭ دېيىشىچە، ياڭ ئادەتتە كىشىلەر بىلەن كۆپ باردى كەلدى قىلمايدىغان گېپى ئاز، ئىچ مىجەز كىشى بولۇپ، ھېچكىم ئۇنىڭ ئامېرىكىدا نېمە خىزمەت قىلىدىغانلىقىنى بىلمەيدىكەن.
ۋەقە يۈز بەرگەن كۈنى ساقچىلار ياڭ نى ئېتىپ ئۆلتۈرۈۋەتكەن. نەق مەيداندىكى گۇۋاھچىلارنىڭ مۇخبىرغا دېيىشىچە، ياڭ كونسۇلغا ھۇجۇم قىلىپ كىرگىنىدە: «خىاي كوممۇنىست پارتىيەسى، قېنى سىلەر؟!» دەپ ۋارقىرىغان.
