ب د ت دا 141دۆلەت بېلەت تاشلاپ رۇسىيەنىڭ دەرھال ئەسكەر چېكىندۈرۈشىنى تەلەپ قىلدى، خىتاي بېلەت تاشلاشتىن ۋاز كەچتى
ئارمان
ئۇيغۇر ئاگېنتلىقى 2023-يىلى 24-فېۋرال
23-فېۋرال بىرلەشكەن دۆلەتلەر تەشكىلاتى ئومۇمىي مەجلىسىدە رۇسىيەنىڭ ئۇكرائىنادىن دەرھال ئەسكەر چېكىندۈرۈشى توغرىسىدا بېلەت تاشلانغان بولۇپ، نەتىجىدە 141 دۆلەت مەزكۇر قارار لايىھىسىگە قوللاش بېلىتى تاشلىدى، خىتاي ۋە ھىندىستاننى ئۆز ئىچىگە ئالغان 32 دۆلەت بېلەت تاشلاشتىن ۋاز كەچتى. رۇسىيە، بېلارۇسىيە، سۈرىيە، شىمالىي كورېيە، مالى، نىكاراگۇئا، ئېرىترېيە قاتارلىق 7 دۆلەت قارشى بېلەت تاشلىدى.
24-فېۋرال رۇسىيەنىڭ ئۇكرائىناغا تاجاۋۇز قىلغانلىقىنى بىر يىل بولغان كۈنىدە خىتاي تاشقى ئىشلار مىنىستىرلىقىنىڭ تور بېتىدە ئاتالمىش ئۇكرائىنا كرىزىسىنى «ھەل» قىلىش توغرىسىدىكى بايانات ئېلان قىلىندى. مەزكۇر باياناتتا خىتاي يەنىلا قۇرۇق سەپسەتىلىرىنى بازارغا سېلىپ ئۆزىنى «تىنچلىق» بىلەن مەسىلىنى ھەل قىلىش تەرەپدارى قىلىپ كۆرسىتىشكە ئۇرۇنغان بولسىمۇ ئەمما رۇسىيەنىڭ دەرھال ئەسكەر چېكىندۈرۈشى توغرىسىدا ھېچقانداق تەپسىلاتلار يېزىلمىغان.
گېرمانىيە باش مىنىستىرى شولز خىتاي باياناتىنى ئېلان قىلىشتىن ئىلگىرى ئەسكەرتىپ، خىتايدىن ھېچقانداق ئۈمىد كۈتۈشكە بولمايدىغانلىقىنى ئېيتقان. ئۇكرائىنا تەرەپنىڭ بىلدۈرۈشىچە، خىتاي مەزكۇر باياناتنى ئېلان قىلىشتىن ئىلگىرى ئۇكرائىنادىن ھېچقانداق مەسلىھەت ئالمىغان.
