2022-يىللىق نوبېل تىنچلىق مۇكاپاتى رۇسىيە، بېلارۇسىيە ۋە ئۇكرائىنانىڭ كىشىلىك ھوقۇق قوغدىغۇچىلىرى ۋە ئورگانلىرىغا بېرىلدى
ئۇيغۇر ئاگېنتلىقى 2022-يىلى 07-ئۆكتەبىر
7-ئۆكتەبىر نورۋېگىيە «نوبېل مۇكاپاتى» باھالاش ھەيئەتلىكى بۇ يىللىق «نوبېل تىنچلىق مۇكاپاتى» نىڭ بېلارۇسىيەلىك كىشىلىك ھوقۇق قوغدىغۇچىسى ئالېس بىيالىياتىسكى Ales Bialiatsk غا بېرىلگەنلىكىنى جاكارلىدى. ئۇنىڭدىن باشقا رۇسىيەدىكى ھۆكۈمەتسىز تەشكىلات «خاتىرە ساراي» ۋە « ئۇكرائىنا پۇقرالار ئەركىنلىك مەركىزى» قاتارلىق ئىككى ئورگانغىمۇ بۇ يىللىق «نوبېل تىنچلىق مۇكاپاتى» بېرىلدى.
خەۋەرلەردە دېيىلىشىچە، مۇكاپات ساھىبى ئالېس بىيالىياتىسكى بۇ يىل 60 ياشقا كىرگەن بولۇپ، نۆۋەتتە بېلارۇسىيە تۈرمىسىگە قامالغان. ئۇ ئىلگىرى «خەلقئارا كىشىلىك ھوقۇق بىرلەشمىسى» نىڭ مۇئاۋىن رەئىسلىك ۋەزىپىسىنى ئۆتىگەن.
«نوبېل تىنچلىق مۇكاپاتى» 1901-يىلىدىن باشلاپ تارقىتىلىپ كېلىۋاتقان بولۇپ، يىلدا بىر قېتىم تارقىتىلىدۇ. بۇ مۇكاپاتنى ئاساسلىقى دۇنيا تىنچلىقىغا تۆھپە قوشقان، ئۆز مىللىتى، دۆلىتى ياكى ئىنسانىيەتنىڭ ئەركىنلىكى ئۈچۈن جېنىنى پىدا قىلغان، تۈرمىلەرگە قامالغان، ئەركىنلىك جەڭچىلىرىگە تارقىتىلىدۇ. مەزكۇر مۇكاپات 1989-يىلى سۈرگۈندىكى تىبەت داھىيسى دالاي لاماغا، 2010-يىلى خىتاي ئۆكتىچىسى ليۇ شىياۋبوغا بېرىلگەن.
«نوبېل تىنچلىق مۇكاپاتى» نىڭ 120يىلدىن ئارتۇق تارىخىدا ئۇيغۇرلاردىن رابىيە قادىر خانىم بەش قېتىم(2005، 2006، 2007، 2009، 2010)، قاماقتىكى ئۇيغۇر زىيالىيسى ئىلھام توختى ئەپەندىم بىر قېتىم (2019) نامزاتلىققا كۆرسىتىلگەن. ئەمما دۇنيادىكى ئەڭ ۋەھشىي دىكتاتور خىتايغا قارشى بويۇن ئەگمەي ئۆزىنىڭ ئەركىنلىكى، شۇنداقلا دۇنيا تىنچلىقى ئۈچۈن ئەڭ زور بەدەللەرنى تۆلەپ، كۈرەش قىلىپ كەلگەن ئۇيغۇر مىللىتى ئىچىدىن تا بۈگۈنگە قەدەر بۇ ئاتالمىش «تىنچلىق» مۇكاپاتىغا ئېرىشكەن بىرىنىڭمۇ چىقىپ باقمىغانلىقىدەك بىر ھەقىقەت، «نوبېل مۇكاپاتى» جۈملىدىن دۇنيا تارىخىدىكى بىر نومۇستۇر!
ئارمان تەييارلىغان
