مەنبەسى:قازاقستان ئۇيغۇرلىرى باشقۇرۇشىدىكى «دوپپا ھاياتى»ھېساۋاتى
ئىدرىس نەرىمانوۋىچ يەھياروۋ 2001-يىلى تالغار شەھىرىدە دۇنياغا كەلگەن. ئوتتۇرا مەكتەپ مەزگىلىدە ئۇ ئىنستاگرام ۋە تىكتوك قاتارلىق ئىجتىمائىي تاراتقۇلارغا مەزمۇن يېزىشقا قىزىقىپ قالغان. ئون بىرىنچى سىنىپقا كەلگەندە، ئىدرىس بۇ سۇپىلاردا ئۆزىنىڭ ئالاھىدە ئۇسلۇبى ۋە جەلپكارلىقى بىلەن تېزلا داڭق چىقارغان.
ئۇنىڭ بلوگلىرى كۆڭۈللۈك مەزمۇنلىرى بىلەن تونۇلۇپ، قىسقا ۋاقىت ئىچىدە ياشلار ئارىسىدىكى ئەڭ نوپۇزلۇق تور يازغۇچىلىرىدىن بىرىگە ئايلانغان.
ئىدرىسنىڭ يازمىلىرى تۇرمۇش، ساياھەت ۋە ئۇسسۇل قاتارلىق ھەر خىل ساھەلەرنى ئۆز ئىچىگە ئالىدۇ. ئۇنىڭ تىرىشچانلىقى ۋە ئىجادچانلىقى نەتىجىسىدە، ئىدرىس يەھياروۋ رەقەملىك دۇنيادا مۇۋەپپەقىيەت قازىنىشنى ئارزۇ قىلغان نۇرغۇنلىغان ياشلارغا ئۈلگە بولۇپ قالدى. ھازىر ئۇنىڭ تىكتوك ھېساباتىنىڭ سەككىز مىليوندىن ئارتۇق، ئىنستاگرام ھېساباتىنىڭ بولسا ئالتە يۈز مىڭدىن ئارتۇق ئەگەشكۈچىسى بار. ئىدرىس يەنە چوڭ بانكىلار ۋە خەلقئارالىق شىركەتلەر بىلەن ھەمكارلىشىپ، ئۇلارغا رېكلام فىلىملىرى ئىشلەپ بېرىدۇ.
ئۇنىڭ نۇرغۇن سىن-ئەسەرلىرى ۋە سۈرەتلىرى بەزىدە كۆرەرمەنلەرگە چۈشىنىكسىز تۇيۇلسىمۇ، ئەمەلىيەتتە بۇلار پەقەت ئۇنىڭ ئىجادىي چۈشەنچىسىنىڭ ئىپادىسى، خالاس. تاشقى كۆرۈنۈش ھەر دائىم كىشىنىڭ ئىچكى دۇنياسىنى تولۇق ئەكس ئەتتۈرەلمەيدۇ.
ئىدرىس يىللاردىن بۇيان قازاقىستان مودا ھەپتىسىدە ئۆتكۈزۈلىدىغان مودا كۆرگەزمىلىرىگە پائال قاتنىشىپ كەلمەكتە. 2024-يىلى 18-ئىيۇن كۈنى، ئۇ قازاقىستان مودا كەسپىگە قوشقان تۆھپىسى ئۈچۈن مۇكاپاتلاندى ھەمدە «يىلنىڭ ئەڭ ياخشى تور يازغۇچىسى» ئۇنۋانىغا ئېرىشتى.
مۇكاپات تارقىتىش مۇراسىمىغا بايان ئالاگۇزوۋا، لىلىيا راخ قاتارلىق جەمئىيەتتىكى كۆزگە كۆرۈنگەن زاتلار قاتناشتى. ئۇلار ئىدرىسنىڭ ئەمگىكىگە يۇقىرى باھا بېرىپ، ئۇنىڭغا ئىلھام بېغىشلايدىغان ئىللىق سۆزلەرنى قىلدى.
