ھەبىبۇللا ئىزچى
ئۇيغۇر ئاگېنتلىقى، 2020- يىلى 4- دېكابىر
شۋېتسارىيەدىكى خەلقئارالىق ئەلرايى تەشكىلاتى كامپاكىس بۈگۈن شۋېتسارىيەنىڭ زۈرىخ شەھرىنىڭ مەركىزىدىكى پويىز ئىستانسسىسى ئەتراپىدا، شۋېتسارىيەنىڭ ئەڭ چوڭ دۇنياۋىي بانكىسىنىڭ قارشى تەرىپىدىكى بىناغا 20 مېتىر ئۇزۇنلۇقتىكى مەشھۇر لاگېر رەسمىنى ئېسىش ئارقىلىق، بۇ بانكىنى خىتاي بىلەن بولغان ھەمكارلىقىنى توختىتىشقا چاقىرىق قىلدى.
لوزۇنكا ئېسىلغاندىن كېيىن ئەتراپتىكى پۈتۈن بىنادىكىلەر دېرىزىگە يېقىنلىشىپ بۇ لوزۇنكىنى كۆردى.
لوزۇنكىدا ھەممىدىن بەكراق جەلىپ قىلغىنى UBS بانكىسىنى خىتاينىڭ خىكۋىسىيۇن شىركىتى بىلەن ھەمكارلاشماسلىققا چاقىرىق قىلغان UBS خېتى ئىدى. «UBS-Hikvisionشېرىكلىك يوق.»
دەرۋەقە، چوڭ بانكا خىتاي ھۆكۈمىتىنىڭ ئۇيغۇرلارنى ۋە باشقا ئاز سانلىق مىللەتلەرنى كونترول قىلىشتا قوللىنىلغان نازارەت سىستېمىسىغا قاتناشقان. شەرقىي تۈركىستاندا ھەربىر كوچا بۇلۇڭىغا، مېھمانخانا ۋە ھەتتا كىرا ماشىنىلىرىغىچە كۆزىتىش كامېراسى ئورنىتىلغان. نەچچە يۈز مېتردا بىر ساقچى پونكىتى بار، مۇھىم جاي ۋە كوچىلاردا ھەممە يەردە ئادەملەرنىڭ يۈزلىرىنى سىكانىرلايدىغان كامېرالار بار. خىتاي بۇ كامېرا ۋە يۇمتال پروگراممىلىرىنىڭ ياردىمىدە پۇقرالارنىڭ ئەقلىي ئىقتىدارلىق تېلېفون ئۇچۇرىغا ئېرىشەلەيدۇ ھەمدە ئۇلارنىڭ سانلىق مەلۇماتلىرىنى ئۈزلۈكسىز توپلىيالايدۇ. دۆلەت قىزىقىدىغانلارنىڭ ھەممىسى مەركىزىي سانداندا ساقلىنىدۇ. ئەگەر بىر ئادەم جىنايەت گۇماندارىغا ئايلانسا، ئۇلار «قايتا تەربىيىلەش لاگېرى» غا ئەۋەتىلىدۇ ، بۇ يەردە قىيناش، باسقۇنچىلىق ۋە مەجبۇرىي تۇغماس قىلىش قاتارلىق ۋەھشىي جىنايەتلەرنىڭ ھەممىسى بار. تۇتقۇنلار ھەر ۋاقىت نازارەت ئاستىدا بولىدۇ.
شۋېتسارىيەنىڭ چوڭ بانكىسى UBS نىڭ خىتاي Hikvision گۇرۇھى بىلەن ئۇزۇن يىللىق سودا مۇناسىۋىتى بار. Hikvision ئۇيغۇرلارنى نازارەت قىلىش تېخنىكىسى بىلەن تەمىنلەيدۇ. خەلقئارا جەمئىيەتنىڭ تەنقىدلىرىگە ۋە ئامېرىكىنىڭ Hikvision غا قاراتقان جازالىرىغا قارىماي، UBS داۋاملىق سودا مۇناسىۋىتىنى ساقلاپ كەلدى.
بۇ يىل ئىيۇندا، تەھدىتكە ئۇچرىغان خەلق جەمئىيىتى (SPM) ئاللىقاچان UBS ئۈستىدىن ئەرز سۇندى. يەكشەنبە كۈنى، Campax جەمئىيىتى UBS غا بېسىمنى كۈچەيتىش ئىلتىماسىنى سۇندى. شۇنىڭدىن ئۈمىد كۈتۈشكە بولىدۇكى، بۈگۈنكى ھەرىكەت UBS قا بىزنىڭ ئۇلاردىن نېمە تەلەپ قىلىۋاتقانلىقىمىزنى ئايدىڭلاشتۇردى: Hikvision بىلەن بولغان سودا مۇناسىۋىتىڭنى دەرھال توختات!
UBS نىڭ Hikvision بىلەن ھەمكارلىق مۇناسىۋىتىنى توختىتىشى، Hikvision نى ئىقتىسادىي بايلىقىدىن مەھرۇم قىلىپلا قالماي، باشقا مەبلەغ سالغۇچىلار ۋە خىتاي ھۆكۈمىتىگىمۇ ئېنىق سىگنال بېرىدۇ.
