ئاپتورى: نەفىسە نۇر
ئۇيغۇر ئاگېنتلىقى
2019-04-09
[ئەسكەرتىش: تور بېكىتىمىزدە ئېلان قىلىنغان تەرجىمە خەۋەر ياكى ماقالە، ئۈچىنچى تەرەپ ئاپتورلۇقىدىكى ماقالە، ئوبزورلار باشقىلارنىڭ كۆز قارىشى بولۇپ، ئۇيغۇر ئاگېنتلىقىنىڭ كۆز-قاراش ياكى مەيدانىغا ۋەكىللىك قىلمايدۇ، ئۇيغۇر ئاگېنتلىقى باش ماقالىسى ياكى مەخسۇس سەھىپىلىك ماقالىسىلا ئۇيغۇر ئاگېنتلىقىنىڭ مەيدانىغا ۋەكىللىك قىلىدۇ.]
ۋەتىنىمىزدە خىتتاي زالىملىرى ئۇيغۇر تۈركى پەرزەنتلىرىنى ئۆز ئانا تىلىنى ئۆگىنىشتىن مەھرۇم قىلىۋاتقان، ئۇيغۇر تۈركچىسىدىكى كىتاب-ماتىرىياللار يوقىتىلىۋاتقان، ھەتتا ئۇيغۇر تۈركچىسىدە سۆزلەشكىمۇ يول قويۇلمايۋاتقان، ئۇيغۇر تۈركچىسى تارىختىن بۇيانقى ئەڭ غېرىبلىقتا قالغان بۇ كۈنلەردە دۇنيانىڭ ھەرقايسى دۆلەتلىرىدە ياشاۋاتقان ئاۋانگارت ياشلىرىمىز خىتتاينىڭ بۇ ھۇجۇملىرىغا قارشى ئانا تىلىمىزنى قوغداش كۆرىشىنى باشلاپ، ئۆزلىرى ياشاۋاتقان دۆلەتلەردە ئانا تىل مەكتەپلىرىنى قۇرۇپ، مۇھاجىرەتتىكى ئۇيغۇر ئۆسمۈرلىرىگە ئانا تىل ئۆگىنىش سورۇنلىرىنى ھازىرلاپ بەردى، بۇنىڭغا ئەگىشىپ بالىلارنىڭ ئانا تىل كىتابلىرى كەمچىل بولۇش مەسلىلىرىمۇ ھەل بولۇشقا باشلىدى، ھەتتا مۇھاجىرەتتىكى بالىلىرىمىزنىڭ تارىم غۇنچىلىرى – تۆتقۇلاق ئۆسمۈلەر ژورنىلى نەشىردىن چىقىپ، بۈگۈن ئىستانبولدىكى تەكلىماكان كىتابخانىسىدا ئىمزالىق سىتىش پائالىيتى ئۆتكۈزۈلدى.
تۆتقۇلاق ئۆسمۈرلەر ژورنىلى پەسىللىك ژورنال بولۇپ، ئەۋلاد نەشىرىياتى، «ئايخان» مائارىپى، ھەرقايسى ئانا تىل مەكتىپى ئوقۇتقۇچىلىرى ۋە باشقا نۇرغۇنلىغان پىداكار قېرىنداشلارنىڭ جاپالىق ئەمگىكىنىڭ مىۋىسىدۇر ۋە مۇھاجىرەتتىكى بالىلىرىمىزنىڭ ئەدەبىيات – سەنئەت ئەسەرلىرىنى ئېلان قىلىدىغان سەھنىسى بولۇپ، ئوماقلىرىمىزنىڭ ئانا تىلنى ئۆگىنىش ۋە كۈچەيتىشتىكى ياخشى يىتەكچىسى ۋە يىقىن دوستى بولغۇسى!!!
ئانا تىلىمىز ئاللاھنىڭ بىزگە بەرگەن نىئېمىتى، ئەجدادلىرىمىزنىڭ ۋە زۇلۇم ئىچىدە ئىڭراۋاتقان خەلقىمىزنىڭ بىزگە تاپشۇرغان ئامانىتىدۇر. بۇ نىئېمەتنى قەدىرلەش ۋە ئامانەتنى ياخشى ساقلاش ھەر بىر ئۇيغۇر تۈركىنىڭ ئادا قىلىشقا تىگىشلىك پەرزى ۋە قەرزىدۇر، بۇ پەقەت ئانا تىلىمىزنى ھەقىقىي قوغداش، پەرزەنتلىرىمىزگە ئانا تىلىمىزنى ياخشى ئۆگىتىش بىلەن، ھەربىر ئائىلە بىر ياخشى ئاناتىل مەكتىپى بولۇش، ھەربىر ئاتا-ئانا ياخشى بىر ئانا تىل ئۇستازى بولۇش بىلەن، ئۆز تىل-يېزىقىمىزدا نەشىردىن چىقىۋاتقان كىتاب- ژورناللىرىمىزنى غىرىب قويماستىن تالىشىپ سىتىۋىلىش، ئوقۇش بىلەن ئەمەلگە ئاشىدۇ.
ئۇيغۇر ئاگېنتلىقىمىز مۇھاجىرەتتە بالىلىرىمىزغا خاس ئوقۇشلۇق بولماسلىقتەك بوشلۇقنى سىيرەت ئۆسمۈرلەر ژورنىلى ۋە تۆتقۇلاق ئۆسمۈرلەر ژورنىلى بىلەن تولدۇرغان، پەرزەنتلىرىمىزگە پايدىلىق نۇرغۇن ئىلمىي ئەمگەكلەرنى روياپقا چىقارغان ئەۋلاد نەشىرىياتى ۋە باشقا بارلىق پىداكار قېرىنداشلىرىمىزغا كۆپ رەھمەت ئېيتىمىز ۋە تېخىمۇ ئەھمىيەتلىك نەتىجىلەرنى قولغا كەلتۈرىشىڭلارغا تىلەكداشمىز! شۇنداقلا مۇھاجرەتتىكى بارلىق قېرىنداشلارنى سىيرەت ئۆسمۈرلىرى ژورنىلى ۋە تۆتقۇلاق ئۆسمۈرلەر ژورنىلىغا مۇشتەرى بولۇشقا چاقىرىق قىلىمىز!
قوغداش ۋە قوللاش ئېغىزدىكى قۇرۇق شوئار بىلەن ئەمەس ئەمەلىي ھەرىكەت بىلەن بولىدۇ.
تۆتقۇلاق ئۆسمۈرلەر ژورنىلى
— 
سىيرەت ئۆسمۈرلىرى ژورنىلى
— 
مەزكۇر يازمىنى «ئۇيغۇر ئاگېنتلىقى» نامىدا مەنبەسىنى ئەسكەرتىپ ھەرقانداق ئىجتىمائىي ئالاقە ۋاستىلىرىدا كۆچۈرۈپ تارقىتىشقا رۇخسەت قىلىنىدۇ. ئەمما، مەنبەسى ئەسكەرتىلمىگەن ھالدا توردا خالىغانچە ئىشلىتىلسە، نەشىر ھوقوقىمىزغا دەخلى-تەرۇز قىلغان ھېسابلىنىپ جامائەتچىلىككە ئاشكارلىنىدۇ، ھەمدە ئەسەر ھوقۇقى قانۇنى بويىچە قانۇنىي ھوقۇقىمىزنى سۈرۈشتۈرۈش ھوقۇقىمىزنى ساقلاپ قالىمىز.
