ئۇيغۇر ئاگېنتلىقى، 8-ماي ئۇيغۇر ھەرىكىتى تەشكىلاتىنىڭ رەئىسى رۇشەن ئابباس خانىم ۋە ئۇيغۇر ئاكادېمىيەسىنىڭ رەئىسى دوكتور رىشات ئابباس، ئۇيغۇر ھەرىكىتى تەشكىلاتىدىن سابرىنا سوھائىل ۋە ياكوب روپې قاتارلىقلار 6-ماي سەيشەنبە كۈنى ئامېرىكانىڭ سابىق دۆلەت ئىشلىرى مىنىستىرى مايىك پومپېئو بىلەن كۆرۈشۈپ، ئۇنىڭ ئۇيغۇرلار ئۈچۈن قىلغان خىزمەتلىرىگە مىننەتدارلىق بىلدۈردى.
مايىك پومپېئو 2018-يىلدىن 2021-يىلغىچە، ترامپنىڭ تۇنجى نۆۋەتلىك پىرېزىدېنتلىقىنىڭ ئىككىنچى يىلىدىن باشلاپ، دۆلەت ئىشلىرى مىنىستىرى ۋەزىپىسىنى ئۆتىگەن. ئۇ ۋەزىپە مۇددىتىدە ئۇيغۇرلار ئۈچۈن كۆپ قېتىم نۇتۇق سۆزلىگەن، خىتاي ئەمەلدارلىرىنى جازالاش قانۇن ۋە بۇيرۇقلىرىنى ئىجرا قىلغان، ۋەزىپىسى ئاخىرلىشىشقا بىر كۈن قالغاندا، خىتاي ھۆكۈمىتى ئۇيغۇر ۋە باشقا ئاز سانلىق خەلقلەرگە ئىرقىي قىرغىنچىلىق جىنايىتى سادىر قىلدى دەپ جاكارلاپ، دۇنيا بويلاپ باشقا دۆلەتلەرنىڭ خىتاينىڭ جىنايەتلىرىنى ئىرقىي قىرغىنچىلىق دەپ تونۇشىغا يول ئاچقان.
ئىجتىمائىي تاراتقۇلاردىن مەلۇم بولۇشىچە، ھەيئەت – تەشەككۈر بەلگىسى، خاتىرە بۇيۇملار، ھەم شۇنداقلا رۇشەن ئابباس خانىمنىڭ «بىر ئۇيغۇرنىڭ ئەركىنلىك ئۈچۈن كۆرىشى» ناملىق ئەسىرىنى مايىك پومپېئوغا تەقدىم قىلغان.
