ئافراسىياپ، ئۇيغۇر ئاگېنتلىقى
2021- يىلى، 6- ئىيۇل
ياپونيە كيودو ئاگېنتلىقىنىڭ خەۋەر قىلىشچە، ياپونىيە مۇئاۋىن باش مىنىستىرى تارو ئاسو مۇنداق دېگەن: «ئەگەر تەيۋەندە چوڭ ئۆزگىرىش بولسا، ياپونىيەنىڭ مەۋجۇتلۇقىغا بىۋاستە تەھدىت شەكىللەندۈرىدۇ. خىتاي تەيۋەنگە ھۇجۇم قىلسا، ياپونىيە ئامېرىكا بىلەن بىرلىشپ، تەيۋەننى قوغدىشى كېرەك.» يېقىندىن بېرى، شى جىنپىڭ تەيۋەننى بىرلىككە كەلتۈرۈشكە قەسەم قىلغاندىن كېيىن، خىتاي تاراتقۇلىرى تەيۋەننى قانداق بويسۇندۇرۇش ھەققىدە تۈرلۈك تەشۋىقات تارقاتقان بولۇپ، بۇ خىتاينىڭ بىر شەپىسى دەپ قارالماقتا. بۇ ياپونىيە ئەمەلدارلىرىنىڭ ئىككىنچى قېتىم تەيۋەننى قوغداش ھەققىدىكى چاقىرىقى بولۇپ، ھۆكۈمەتنىڭ رەسمىي قارارى ئەمەس، ئەمما بۇنىڭ ئېھتىماللىقى يۇقىرى. ياپونيە ئامېرىكا بىلەن بىرلىشپ تەيۋەننى قوغداشنى ئالىي دەرىجىلىك ئەمەلدارلىرى نامىدىن ئوتتۇرىغا چىققان تۇنجى دۆلەت. ئەتراپتىكى دۆلەتلەر تېخى خىتاينى ب د ت دا تەنقىد قىلىشتىنمۇ ئەيمىنىپ يۈرمەكتە.
