ئۇيغۇر ئاگېنتلىقى 2021-يىلى 23-دېكابىر
مۇبارەك مەسچىتى ئەقسانىڭ ئىمامى، ئىسلام دۇنياسىدا بەلگىلىك نوپۇزغا ئىگە شەيخ ئىكرىما سەئىد سەبرى بۈگۈن ئۆزىنىڭ تۋىتتېرىدا بايانات بېرىپ ماراكەش ھۆكۈمىتىدىن ئۇيغۇر مۇساپىر ئىدرىس ھەسەننى خىتايغا قايتۇرۇپ بەرمەسلىككە دەۋەت قىلدى.
ئۇ تۋىتتېرىدا مۇنداق دەپ يازغان:« ئەگەر بىر مۇشرىك مۇسۇلماندىن پاناھلىق تەلەپ قىلسا ئۇ مۇسۇلماننىڭ بۇ مۇشرىكنى ھىمايە ئاستىغا ئېلىشى ۋە ئۇنى بىخەتەر جايغا يەتكۈزۈپ قويۇشى ۋاجىپتۇر، ئۇنداقتا بىر مۇسۇلمان ئۆزىنىڭ يەنە بىر مۇسۇلمان قېرىندىشىدىن پاناھلىق تەلەپ قىلسىچۇ؟ بىز مۇبارەك ئەقسا مەسچىتى نامىدىن ماراكەش ھۆكۈمىتى مەسئۇللىرىنى تۈركىستانلىق(ئەسلى تېكىستتە تۈركىستان دەپ ئېلىنغان) مۇسۇلمان قېرىندىشىمىز ئىدرىس ھەسەننى خىتايغا قايتۇرۇش قارارىدىن ۋاز كېچىشكە چاقىرىمىز.»
ئۇ يازغان تىۋىتىنىڭ ئاستىغا ئىنكاس شەكلىدە يەنە مۇنداق دەپ يازغان: «خىتاي ئىسلامغا ۋە مۇسۇلمانلارغا قارشى تۇرىدىغان كاپىر دۆلەت، ئۇلار ئىدرىس ھەسەنگە ئۆلۈم جازاسى بەرمەكچى، سىلەرنىڭ ئۇنى قوغداش مەجبۇرىيىتىڭلار بار. ئەگەر ئۇنى دۆلىتىڭلاردىن قوغلاپ چىقارماقچى بولساڭلار، چوقۇم بىخەتەر بولغان باشقا بىر دۆلەتكە ئەۋەتىڭلار. سۆيۈملۈك پەيغەمبىرىمىزنىڭ سۆزىنى ئېسىڭلاردا چىڭ تۇتۇڭلار: » مۇسۇلمان مۇسۇلماننىڭ قېرىندىشىدۇر، ئۇلار ئۆزئارا زۇلۇم قىلمايدۇ، ۋە ئۆزئارا ئاسىيلىق قىلمايدۇ»(المسلم أخو المسلم لا يظلمه ولا يُسْلِمه).»
شەيخ ئىكرىما سەئىد سەبرىنىڭ تىۋىتتېر ئۇلانمىسى:
https://twitter.com/DrEkrimasabri/status/1474035762073116676?t=akP_5ppXBq3UKymMWLMyNQ&s=08
ئارمان تەييارلىغان
