تاھىر تالىپ
ئەجدادلىرىم كۆرمىگەن بىگانىغا ئۆيلەندىم،
ۋەتىنى يوق – يۇرتى يوق سەرسانىغا ئۆيلەندىم.
ساۋاپ ئىزدەپ ئەمەس ھېچ، گۇناھىمنى تەن ئېلىپ،
نىكاھ تىلەپ كەلگەن بىر دىۋانىغا ئۆيلەندىم.
كەڭ جاھاننىڭ بۈرجىكى قوشنا ئۆيدۇر ئۇنىڭغا،
يەر شارىنىڭ ھەمراھى شەيتانىغا ئۆيلەندىم.
مىجەز-خۇلقى ئاجايىپ: كۈندە مىڭ رەت ئۆزگىرەر،
كۈندە باشقا چۈش كۆرەر ئەپسانىغا ئۆيلەندىم.
بەكمۇ سۆزمەن، جاھاندا بىلمەيدىغان گېپى يوق،
بايمەن شۇڭا، ئەڭ كاتتا سۆز كانىغا ئۆيلەندىم.
پىلىمۇتتەك ئاغزى بار ، ئۇپرىمايدۇ ، تالمايدۇ،
راست گەپ دىگەن ئەسلا يوق، يالغانىغا ئۆيلەندىم.
يالماۋۇزدۇر تەلەتى ، زۇلمەت ياغار ئەپتىدىن،
خۇشاللىقتىن ئەسەر يوق زىندانىغا ئۆيلەندىم.
جاپا، خورلۇق، نۇمۇسلار ئۇنىڭ ئۈچۈن ھېچنىمە،
پۇل-مال ئۈچۈن جان بىرەر مەردانىغا ئۆيلەندىم.
پۇت-قوللىرى كالامپاي، گۈلزارىمنى چەيلىدى،
كىپىنىنى يەيدىغان ۋەيرانىغا ئۆيلەندىم.
تاس قالىدۇ ھەتتاكى يەپ قويغىلى مېنى ھەم،
داخىر كولۋا-تويماسنىڭ خۇمدانىغا ئۆيلەندىم.
ۋەدىلىرى چىرايلىق، سانى قۇمدەك، يۇلتۇزدەك،
لېكىن دىلى قۇندۇزدەك ، قاپقانىغا ئۆيلەندىم.
لېكىن ئەمىن بولۇڭلار، گۆركارىمەن جۈپتۈمنىڭ،
ئۆزۈم ئۆچمەس بىر يالقۇن ، پەرۋانىغا ئۆيلەندىم.
2008- يىلى 23-24. فىۋرال. قەشقەر
