ئۇيغۇر ئاگېنتلىقى 2021-يىلى 2- نويابىر
ئامىنە سەدەف
10-ئاينىڭ 30-كۈنى تۈركىيە پايتەختى ئەنقەرەدە «ئومجا» نەشرىياتىنىڭ ئورۇنلاشتۇرۇشى، « تۈرك ئوجاكلىرى» مەركىزىنىڭ ساھىبخانىلىق قىلىشى بىلەن شىۋېتسىيەدە ياشايدىغان شائىر ئابدۇشۈكۈر مۇھەممەتنىڭ تۈركچە نەشر قىلىنغان « جىمجىتلىقنىڭ ھېكايىسى » ناملىق كىتابىنى تونۇشتۇرۇش پائالىيىتى ئۆتكۈزۈلدى. پائالىيەتكە « تۈرك ئوجاكلىرى» مەركىزىنىڭ رەئىسى، ئەنقەرە «ھاجى تەپە» ئۇنىۋېرسىتېتى تارىخ پەنلىرى پروفېسسورى مەھمەت ئۆز ئەپەندى ۋە ئەنقەرەدە ياشايدىغان بىر قىسىم ئۇيغۇر، تۈرك زىيالىيلار، ئۇنىۋېرسىتېت ئوقۇغۇچىلىرى قاتناشتى.
دوكتور ئەركىن ئەمەتنىڭ رىياسەتچىلىكىدە ئېلىپ بېرىلغان پائالىيەتتە ئالدى بىلەن مەھمەت ئۆز ئەپەندى خىتاينىڭ شەرقىي تۈركىستاندا ئېلىپ بېرىۋاتقان ئىرقىي قىرغىنچىلىق سەۋەبىدىن ئۇيغۇرچە ئوقۇش، يېزىشنىڭ چەكلەنلەنگەنلىكى، ئۇيغۇر ئەدىبلىرىنىڭ تۇتقاندا ئىكەنلىكىدەك بىر ۋەزىيەتتە ئۇيغۇرچە ئەسەرلەرنىڭ تۈركچىگە تەرجىمە قىلىنىشى ۋە تۈركىيەدە نەشر قىلىنىشىنىڭ زور ئەھمىيەتكە ئىگە ئىكەنلىكى ھەققىدە سۆز قىلدى. ئارقىدىن كىتابنى ئۇيغۇرچىدىن تۈركچىگە تەرجىمە قىلغان ئامىنە ۋايىت خانىم كىتابنى ۋە شائىر ئابدۇشۈكۈر مۇھەممەتنى تونۇشتۇردى. ئامىنە خانىم سۆزىدە يەنە ئەدەبىي ئىجادىيەت پائالىيەتلىرىنى پەقەتلا ئىلگىرى ياشاپ ئۆتكەن شائىر، يازغۇچىلارغا ئاتاپ ئۆتكۈزمەستىن، زامانىمىزدىكى شائىر، يازغۇچىلار ۋە ئۇلارنىڭ ئەسەرلىرىگىمۇ ئورۇنلاشتۇرۇشنىڭ شائىر، يازغۇچىلارغا زور ئىلھام بولىدىغانلىقىنى ۋە بۈگۈنكىدەك كۈندە ساناقلىقلا قالغان ئۇيغۇر ئەدىبلىرىنى ۋە ئۇلارنىڭ ئەسەرلىرىنى باشقا تىللارغا تونۇشتۇرۇشنىڭ يوقاپ كېتىش ئالدىدىكى ئۇيغۇر تىلى ۋە ئۇيغۇر ئەدەبىياتىنى قۇتقۇزۇپ قېلىشتا مۇھىم رول ئوينايدىغانلىقىنى ئېيتىپ ئۆتتى .
پائالىيەت شائىر ئابدۇشۈكۈر مۇھەممەتنىڭ شېئىر دېكلاماتسىيەسى ۋە ئۇيغۇر مۇزىكانتلارنىڭ چالغان يېقىملىق مۇزىكىلىرى، ئۇسسۇلچى قاھارجاننىڭ ئوينىغان پەتنۇس ئۇسۇلى بىلەن ناھايىتى جانلىق ۋە قىزغىن ئۆتكۈزۈلدى،
پائالىيەت ئاخىرىدا شائىرغا ۋە تەرجىمانغا گۈلدەستىلەر سوۋغا قىلىندى .
