فرانسىيە پرېزىدېنتى ماكرون پەيشەنبە كۈنى سۈرىيەنىڭ كەلگۈسى توغرىسىدىكى يىغىندا سۈرىيە ۋاقىتلىق ھۆكۈمىتىنى شۇ رايوندىكى رادىكال گۇرۇھلارغا قارشى كۈرەش قىلىۋاتقان ئامېرىكا باشچىلىقىدىكى ئىتتىپاق بىلەن ھەمكارلىشىشقا چاقىردى.
ماكروننىڭ بۇ باياناتى ئامېرىكىنىڭ بۇ رايونغا بولغان مەجبۇرىيىتى ھەققىدىكى مۇقىمسىزلىق ئەھۋالى ئاستىدا ئوتتۇرىغا قويۇلدى. پارىژدا ياۋروپا ۋە ئەرەب دۆلەتلىرى ئارىسىدا ئۆتكۈزۈلگەن پەيشەنبە كۈنىدىكى يىغىن، بەششار ئەسەد مۇستەبىت ھۆكۈمىتى دېكابىردا ئاغدۇرۇلغاندىن كېيىنكى ئۈچىنچى قېتىملىق يىغىن بولۇپ، يىغىنغا سۈرىيە ۋاقىتلىق ھۆكۈمىتىنىڭ تاشقى ئىشلار مىنىستىرى ئەسئەد ئەل-شىبانى قاتناشتى.
ماكرون: «سۈرىيە قالايمىقانچىلىق تارقىتىۋاتقان بارلىق تېررورچى تەشكىلاتلارغا قارشى كۈرەشنى ناھايىتى ئېنىق داۋاملاشتۇرۇشى كېرەك» دېدى. ئۇ يەنە: «ئەگەر سۈرىيە خەلقئارالىق ئىتتىپاق بىلەن ھەمكارلىشىشنى قارار قىلسا» فرانسىيە بۇ ھەرىكەتنى قوللايدىغانلىقىنى قوشۇمچە قىلدى.
