ئۇيغۇر ئاگېنتلىقى
تەييارلىغۇچى: سەبرى
2020-يىلى 21-مارت
3-ئاينىڭ 18-كۈنى، موڭغۇلىيە ھۆكۈمىتى «مۇڭغۇل يېزىقى دۆلەت پىلانى» (3) نى رەسمىي ماقۇللاپ، 2025-يىلىدىن باشلاپ قەدىمكى ئۇيغۇر يېزىقى ئاساسىدىكى مۇڭغۇل يېزىقىنى (يەنى كونا مۇڭغۇل يېزىقى) تۇلۇق ئەسلىگە كەلتۈرۈشنى قارار قىلدى. بۇ پىلانغا ئاساسەن، موڭغۇلىيە 2025-يىلىدىن باشلاپ دۆلەت ئىشلىرىدا كىرىل مۇڭغۇل يېزىقى ۋە كونا مۇڭغۇل يېزىقىنى بىرگە قوللىنىپ، بۇندىن كىيىن پۈتۈنلەي كونا مۇڭغۇل يېزىقىنى قوللىنىش ئۈچۈن تەييارلىق قىلىدىكەن.
تارىخىي سەۋەبلەر تۈپەيلى، موڭغۇلىيە 1946-يىلى كونا مۇڭغۇل يېزىقىنى بىكار قىلغان بولۇپ، كىرىل ھەرپلىرى ئاساسىدا تۈزۈلگەن يېڭى مۇڭغۇل يېزىقىنى (يەنى كىرىل مۇڭغۇل يېزىقى) ئىشلىتىشكە باشلىغان. ئىچكى موڭغۇلدا بولسا ئىزچىل كونا مۇڭغۇل يېزىقى قوللىنىلماقتا.
چىڭگىزخان ئۇيغۇر يېزىقىنى دۆلەت يېزىقى سۈپىتىدە قۇبۇل قىلغان بولۇپ، قەدىمكى ئۇيغۇر يېزىقى ئاساسىدا ئۇيغۇرلار تۈزۈپ بەرگەن مۇڭغۇل تىلى ئېلىپبەسى تا ھازىرغىچە موڭغۇللار تەرىپىدىن قوللىنىلماقتا.
مەنبە: شىنخۇا تورى/ ۋىكىپىدىيا
