يۈسۈپجان
ئۇيغۇر ئاگېنتلىقى 2023-يىلى 8-ئۆكتەبىر
خەلقئارا تاراتقۇلارنىڭ خەۋەر قىلىشىچە، شۇ جاي ۋاقتى 7-ئۆكتەبىر چۈشتىن كېيىن ئافغانىستاننىڭ غەربى شىمال رايونلىرىدا 6.3 بال دەرىجىدە يەر تەۋرەش ئاپىتى يۈز بەرگەن. 8-ئۆكتەبىر تالىبان ھۆكۈمىتى باياناتچىسى زەبىھۇللا مۇجاھىد ئىجتىمائىي تاراتقۇلاردا بايانات بېرىپ مەزكۇر ئاپەتتە 2053 نەپەر كىشىنىڭ قازا قىلىپ 1240 نەپەر كىشىنىڭ يارىلانغانلىقىنى ئېلان قىلغان.
ئامېرىكا گېئولوگىيەلىك تەكشۈرۈش ئىدارىسى (USGS) نىڭ بەرگەن مەلۇماتىغا ئاساسلانغاندا، 7-ئۆكتەبىر ئافغانىستاننىڭ غەربىي شىمالى رايونلىرىدا بىر قانچە قېتىم يەر تەۋرەش يۈز بەرگەن بولۇپ، ئەڭ يۇقىرى دەرىجىسى 6.3 بالغا يەتكەن. تالىبان ھۆكۈمىتىنىڭ مۇئاۋىن باياناتچىسى بىلال كەرىمى بۇ ھەقتە مۇخبىرلارغا مۇنداق دەيدۇ: « ئەپسۇسلىنارلىقى، قازا قىلغانلارنىڭ سانى ئەمەلىي ئەھۋالدىكىدىن خېلىلا يۇقىرى، بىز قۇتقۇزۇش خىزمەتلىرىنىڭ داۋاملىشىشىغا ئەگىشىپ ئەڭ ئاخىرقى توغرا سانلىق مەلۇماتنى كۈتۈۋاتىمىز…»
دۇنيا سەھىيە تەشكىلاتىنىڭ بۇ ھەقتىكى مەلۇماتىغا ئاساسلانغاندا، ئاپەت ئېغىر بولغان ھىرات ئۆلكىسىگە تەۋە 12 يېزىدىكى 600دىن ئارتۇق ئۆي گۇمران بولۇپ 4200دىن ئارتۇق كىشى تەسىرگە ئۇچرىغان. مەزكۇر تەشكىلاتنىڭ بىلدۈرۈشىچە، قۇتقۇزۇش خىزمىتىنىڭ داۋاملىشىشىغا ئەگىشىپ قازا قىلغانلار سانىنىڭ تېخىمۇ كۆپ بولۇشى مۇمكىن ئىكەن.
